ዉዳሴ ማርያም ዘሠሉስ

ዉዳሴሃ ለእግዝእትነ ማርያም ድንግል ወላዲተ ኣምላክ ዘይትነበብ ብ ዕለተ ሠሉስ። እክሊለ ምክሕነ ወቀዳሚተ መድኃኒትነ ወመሰረተ ንዽሕነ ኮነ በማርያም ድንግል፡ እንተ ወለደት ለነ እግዚኣብሔር ቃለ፡ ዘኮነ ሰብኣ በእንተ መድኃኒትነ፡ እምድኃረ ኮነ ሰብአ ጥዩቀ ኣምላክ ፍጹም ዉእቱ፡ ወበእንተዘ ወለደቶ እንዘ ደንግል ይእቲ መንክር ኃይለ ወሊዶታ ዘኢይትነብር፡ሰአሊ ለነ ቅድስት።

እስመ በፈቃዱ ኣቡሁ፡ ወመንፈስ ቅዱስ መጽኣ ወአድኃነነ። ዐቢይ ዉእቱ ስብሓተ ድንግልናኪ ኦ ማርያም ድንግል ፍጽምት፡ ረከብኪ ሞገስ እግዚኣብሔር ምስለኪ፡ ኣንቲ ዉእቱ ስዋስዉ ዘርእያ ያዕቆብ እምድር ዘይበጽሕ እስከ ሰማይ፡ ውመላክተ እግዚኣብሔር የዐርጉ ወይወርዱ ዉስቴታ፡ ሰኣለ ለነ ቅድስት።

አንቲ ዉእቱ ገራህት ዘኢተዘርአ ዉስቴታ ዘርእ፡ ወዕአ እምኔኪ ፍሬ ሕይወት፡ አንቲ ዉእቲ መዝገብ ዘተሣየጠ ዮሴፍ፡ ወረከበ በዉስቴታ ባሕርየ ዕንቄ ክብረ፡ ዘዉእቱ መድኃኒነ ኢየሱስ ክርስቶስ ተዐዉረ በከርሥኪ ወወለድሊዮ ዉስተ ዓለም፡ ሰአሊ ለነ ቅድስት።

ተፈሥሒ ኦ ወላዲተ እግዚእ ኃሤቶም ለመላእክት፡ ተፈሥሒ ኦ ንጽሕት ዜናሆሙ ለነብያት፡ ተፈሥሒ እስመ ረከብኪ ሞገሰ እግዚአብሔር ምስለኪ፡ ተፈሥሒ እስመ ተወከፍኪ ቃሎ ለመልአኪ ፍስሐ ኩሉ ዓለም፡ ተፈሥሒ ኦ ወላዲተ ፈጣሬ ዓለም፡ ሰኣሊ ለነ ቅድስት።

ኦ ድንግል ኦ ቅድስት፡ ኦ ወላዲተ እግዚእ፡ እስመ ወለድኪ ለነ ንጉሥ፡ መንክር ምሥጥር ኃደረ ላዕሌኪ ለመድኃኒተ ዚአነ።ናርምም እስመ ኢንክል ፈስሞ ጥዓቁቀ ነኒረ፡ በእንተ ዕበዩ ለዉእቱ ገባሬ ሠናያት በብዙኃ መንከሩ ራእይ፡ ሰኣሊ ለነ ቅድስት።
ቃለ ኣብ ሕያዉ ዘወረደ ዉስተ ደብረ ሲና ወወሀበ ሕገ ለሙሴ፡ ወከደነ ርእሰ ደብር በጊሜ ዉጢስ ወጽልመት ወነፍስ፡ ወበድምፀ ቃለ ኣቅርንት ይጌሥፅ ለእለ ይቀዉሙ በፍርሃት፡ ሰኣሊ ለነ ቅድስት።

ዉእቱኬ ዘወረደ ኅቤኪ፡ ኦ ደብር ነባቢት በትሕትና መፍቀሬ ሰብእ፡ ተሰብኣ እምኔኪ ዘእንበለ ዉላጤ ፍጹመ ሥጋ ነባቢ ዘከማነ፡ በመንፈስ ጥበብ ኣምላክ ኃደረ ላዕሌሃ፡ ኮነ ፍጹም ስብአ ከመ ያድኅኖ ወይሥረይ ኃጢአቶ ለኣዳም፡ ወያንብሮ ዉስጠ ሰማያት ወያግብኦ ኅበ ዘትካት መንበሩ፡ በዕበይ ሣህሉ ወምሕረቱ። ሰኣሊ ለነ ቅድስት።

ዕበያ ለድንግል ኢይትከሃል ለተነግሮ እስመ እግዚእ ኃረያ፡ መጽአ ወኃደረ ላዕሌሃ ዘየኃድር ዉስተ ብርሃን ኅበ አልቦ ዘይቀርቦ ተዐዉረ በከርሣ ፱ ተ አዉራኃ ዘኢይትረአይ ወዘኢትዓወቅ ወለደቶ ማርያም እንዘ ድንግል ይእቲ፡ ሰአሊ ለነ ቅድስት።
ዘዉእቱ እብን ዘርእየ ዳኒኤል ነብይ፡ ዘተበትከ እምደብር ነዋኅ ዘእንበለ፡ እድ፡ ዘዉእቱ ቃል ዘወዐኣ እምኅበ ኣብ መጽእ ወተሰብኣ እምድንግል ዘእንበለ ዘርኣ ብእሲ ወኣድኃነነ፡ ሰኣሊ ለነ ቅድስት።

ኮንኪ ዓፅቀ ንጹሐ ወሙዳየ አሚን፡ ርትዕት ሃይማንኖቶሙ ለቅዱሳን ኣበዊነ፡ ኦ ንጽሕት ወላዲተ ኣምላክ ድንግል ኅትምት ወለድኪ ለነ ቃለአብ ኢየሱስ ክርስቶስ መጽአ ለመድኃኒትነ፡ሰአሊ ለነ ቅድስት።

አንቲ እሙ ለብርሃን ክብርት ወላዲት እግዚእ እንተ ፃርኪያ ለቃል ዘኢይትረአይ፡ እምድኅረ ወለድኪ ኪያሁ ነበርኪ በድንግልና፡ በስብሐት ወበባርኮት ያዐብዩኪ፡ ሰአሊ ለነ ቅድስት።

አይ ልሳን ዘይክል ነቢበ ዘይት ነገር በእንቲአኪ ኦ ድንግል ንጽሕት እሙ ለቃለ ኣብ ኮንኪ መንበሮ ለንጉሥ ለዘይፀዉርዋ ኪሩቤል፡ ናስተበፅዐኪ ኦ ቡርክት፡ወንዘክር ስምኪ በኩሉ ትዉልድ ትዉልድ ኦ ርግብ ሠናይት እሙ ለእግዚእነ ኢየሱስ ክርስቶስ፡ ሰአሊ ለነ ቅድስት።

ተፈሥሒ ኦ ማርያም እም ወአመት፡ እሰመ ለዘዉስተ ሕፅንኪ ይሰብሕዎ መላእክት ወኪሩቤል ይሰግዳ ሎቱ በፍርሃት፡ ወሱራፌል ዘእንበለ ጽርዓት ይሰፍሑ ክነፈሆሙ ወይበሉ፡ ዝንቱ ዉእቱ ንጉሠ ሰብሐት መጽእ ይሥረይ ኃጢአተ ዓለም በዕበየ ሣህሉ ፡ሰኣሊ ለነ ቅድስት