ዐንቀጸ ብርሃን

ዉዳሴ ወግናይ ለእመ አዶናይ፡ ቅድስት ወብፅዕት፡ ስብሕት ወቡርክ፡ ክብርት ወልዕልት ዐንቀጸ ብርሃን፡ መዓርገ ሕይወት ወማኅደረ መለኮት ቅድስተ ቅዱሳን፡ አንቲ ዉእቱ ኦ እግዚትነ ወላዲተ አማላክ ማርያም ድንግል፡ ተደመይኪ ሥምረተ አብ ወማኅደረ ወልድ፡ ወምጽላለ ዘቅዱስ መንፈስ፡ ኦ ብርክት እምክሉ ፍጥረት፡ አንቲ ዉእቱ ህየንተ አርያም ዘበሰማያት ዘኮንኪ አርያመ በዲበ ምድር፡ ብኪ አስተማሰሉ ቅዱሳን ነቢያት፡ ካህናት ወነገሥት፡ ገብሩ ሎሙ ቅድስተ ቅዱሳን፡ ወዉስቴታ ጽላተ ኪዳን፡ ወልድኪ ሣህሎ ይክፈለነ፡ ሰአሊ ለነ ቅድስት።

በእንተ ተሠግዋቱ ለወልደ አምላክ እምኔኪ፡ ወብኪ ቅሩብነ ኮነ።
ዐሠርቱ ቃላት እለ ተጽሕፉ በአፃብዒሁ ለእግዚአ ኩሉ ፍጥረት፡ ኅደረ ወልደ አምላክ ላዕሌኪ አብ በየማነ ከደነኪ ወቅዱስ መንፈስ ጸለለኪ ወኃይለ ልዕል አጽንዐኪ፡ ወኢየሱስ ለብሰ ሥጋ ዚአኪ ከልሐ ወይቤ፡ ዘጸምአ ይምጻእ ኅቤየ ወይሰተይ፡ በከመ ይቤ መጽሓፍ አፍላገ ማየ ሕይወት ዘይዉኅዝ እምከርሡ፡ ወልድኪ ሣህሎ ይክፈለነ ሰአሊ ለነ ቅድስት።

ቀዳሙ ዜነወነ አብ ብየውጣ እንተ ይእቲ ዐሠርቱ ቃላት እለ ጽሑፋት በአፃብዒሁ ለእግዚአብሔር፡ ወመሀረነ እየሱሱ ክርስቶስ፡ ከመ አንተ ናሕቲትቱ ወልድ ለከ፡ ከመዝ ነአምን ዘአልቦቱ እም በሰማያት፡ ወአብ በዲበ ምድር፡ ዘወረደ እምሰማያት እንዘ አልቦ ዘየአምር ምጽአቶ ዘእንበለ አቡሁ ባሕቲቱ ወጳራቅሊጦስ መንፈስ ጽድቅ፡ ኅደረ ዉስተ ከርሥኪ ወፆርኪዮ ተስዐተ አውራኅ፡ ተፈሥሑ ሰማያት ወተኅሥየት ምድር በልደቱ ለወልድኪ፤ መልአክ ዜነወ ፍሥሓ ወሓራ ሰማይ ሰብሑ እንዘ ይብሉ ''ስብሓት ለእግዚአብሔር በሰማያት፡ ወሰላም በምድር ለዕጓለ እመሕያዉ ሥምረቱ'' ወኖሎት በቤተ ልሔም አንከሩ እምዚርእዩ ወሰምዑ፡ ሰብአ ሰገል ርእዮሙ ኮከበ መጽኡ እምርኁቅ ብሔር ከመ ይሰግዱ ለወልድኪ ወይግነዩ ለኪ፡ ውእቱ ኮከብ ዘመርሖሙ እምሥራቅ ወአብጽሖሙ እስከ ቤተ ልሔም ወቆመ መልዕልቴኪ ኅበ ሀሎኪ አንቲ ምስለ ሕፃንኪ፡ ወር እዮሙ እሙንቱ መሰግላን ተፈሥሑ ዐብየ ፍሥሓ፡ ቦኡ ኅቤሁ ወቆሙ ቅድሜሁ ወወድቁ ዲበ ምድር ወሰገዱ ሎቱ፡ ወአርኅዉ መዛግብሆሙ።
ወአብኡ ሎቱ አምኃ ወርቀ፡ ከርበ፡ ወስኂነ፡ ወይቤሉ አምኃ አባእነ ለከ፡ ዕጣነ አቅረብነ ለከ፡ እምዚአከ ለክቡር ስምከ፡ ኦ አምላክነ በእንተ ኅጢአተ ሕዝብከ ከመ ትትወከፍ ስእለቶም ወመሥዋዕቶም ዘመጻእከ ከመ ትሥረይሎም ኃጢአቶም፡ ወልድኪ ሣህሎ ይክፍለነ ሰአሊ ለነ ቅድስት።

አንቲ ዉእቱ ንጽሕት እምንጹሓን፡ ቤተ መቅደስ ከመ ታቦት ዘግቡር እምዕፅ ዘኢይነቅዝ፡ ሥርግዉ በወርቅ ንጡፍ ወልቡጥ በዕንቄ ባሕርይ ዘየኃቱ ዘብዙኅ ሤጡ፡ከመዝ ነበርኪ ዉስተ ቤተ መቅደስ፡ ወመላእክት ያመጽኡ ወትረ ሲሳየኪ፡ ከመዝ ነበርኪ ዐሠርተ ወክልኤተ ዓመተ እንዘ ትትናዘዚ እምኅበ መላእክት ስቴኪኒ ስቴ ሕይወት ዉእቱ። መብልዕኪኒ ኅብስት ሰማያዊ፡ ዳዊት አቡኪ ዘመረ በመሰንቆ ወኅለየ በመዝሙር እንዘ ይብል በመንፈስ ትንቢት፡ ስምዒ ወለትየ ወርእዩ ወአፅምዒ እዝነኪ፤ ርስዒ ሕዝበኪ ወቤተ አቡኪ እስመ ፈተወ ንጉሥ ሥነኪ፡ እስመ ዉእቱ እግዚእኪ ወሎቱ ትሰግዲ፡ ወልድኪ ሣህሎ ይክፈለነ ሰአሊ ለነ ቅድስት።

ገብርኤል መልአክ እመላእክት ንጹሓን ዘአልቦ ሙስና፡ እመላእክት ቀደምት ዘይቀዉም ቅድመ እግዚአ ኩሉ አብሠረኪ ወይቤለኪ ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ ቡርክት አንቲ እምአንስት ረከብኪ ሞገሰ በኅበ እግዚኦ ኩሉ ወናሁ ትፀንኪ ወትወልዲ ወልድ፡ ወትሰምዩዮ ስሞ ኢየሱስ፡ ዉእቱ ውይሁቦ እግዚአብሔር አምላክ መንበረ ዳዊት አቡሁ፡ ወይነግሥ ለቤተ ያዕቂብ ለዓለም፡ ወአልቦ ማኅለቅት ለመንግሥቱ፡ መንፈስ ቅዱስ ይመጽእ ላዕሌኪ፡ ወኃይለ ልዕል ይጸልለኪ፡ ዘኒ ይትወለድ እምኔኪ፡ ቅዱስ ዉእቱ ወይሰመይ ወልደ እግዚኦ ኩሉ ዘተወልደ እምኔኪ፤ ሣህሎ ይክፍለነ ሰአሊ ለነ ቅድስት።

እንቲ ዉእቱ ዘኮንኪ ጽርሐ ቅድሳት ወመቅደሰ ቅድስተ ቅዱሳን ወመንጦላዕተ ብርሃን፡ ወመንበረ ስብሐት ዘኢይተረጎም፡ አስተማ ሰልናኪ ኦ ቅድስት ማርያም በመቅደሰ ቅድስተ ቅዱሳን፡ በእንተ ቅዱስ መንፈስ ዘመጽአ ላዕሌኪ፡ ወኃይለ ልዑል ጸለለኪ፡ ወመንጦላዕተ ብርሃንሰ በእንተ ዘተሠወረ ቃለ አብ ኢየሱስ ክርስቶስ መድኃኒነ ዉስተ ከርሥኪ፡ እግዚአ ኩሉ ዘመልዕልት፡ ዘይሴብሕዎ መላእክት ወሊቃነ መላእክት አጋእዝት ወሥልጣናት ኃይላት ወመናብርት ወመኳንንት።
ወሶበ ወለድኪ ወልደኪ በዲበ ምድር በውስተ ጎል ከለሉኪ ኪሩቤል እለ ብዙኃት አዕንቲሆሙ፡ ወሱራፌል እለ ስድስቱ ክነፈሆሙ፡ ወደመናተ ብርሃን ፆዱኪ፡ሊቃነ መላእክት ወሠራዊተ መላእክት ወሐራ ሰማይ ቆሙ ቅድሜኪ በፍርሃት ወበረዓድ፡ ወበህየ በካልእ ስብሐት ወደሱኪ ኪሩቤል ወሱራፌል ዘኢኮነ እምስብቲሆሙ ዘዉስተ ሰማያት ወኢ እምስብሐቲሆሙ ዘአስተጋብኦ ኪሎ ፍጥረታተ እንዘ ይነብር ዉስተ ሕፅንኪ፡ ወዘይሴሲ ለኩሉ ፍጥረት ይጠቡ ሐሊበኪ ከመ ሕፃን፡ ኅሠሥዎ ዉስተ አርያም ወበህየ ረከብዎ ምስለ አቡሁ ወመንፈስ ቅዱስ ከመ ትካት፡ ወሶበ ርእዩ እግዚኦሙ ዘአስተጋብአ ኩሎ ፍጥረታት እንዘ ይነብር ዉስተ ኅፅንኪ፡ ወዘይሴሲ ለኩሉ ፍጥረት ይጠቡ ሐሊበኪ ከመሕፃን፡ ኅሠሥዎ ውስተ አርያም ወበህየ ረከብዎ ምስለ አቡሁ ወመንፈስ ቅዱስ ከመ ትካት፡ ወሶበ ርእዩ ትሕትናሁ ለእግዚኦሙ አልዐሉ አዕይንቲሆሙ ላዕለ ውስተ አርያም፡ ሰፍሑ ክነፈሆሙ ወሰብሑ ለእግዚኦም እንዘ ስብሐት ለከ እግዚኦ ኩሉ በሰማያት፡ ወዓዲ ርአዩኪ በውስተ በዓት ለኪ ለባሕቲትኪ ምስለ ሕፃንኪ ወይቤሉ ሰላም በዲበ ምድር፡ ወሶበ ርእዩ እንዘ ይለብሱ ሥጋ ዚአነ ዘነሥአ እምኔኪ ሰገዱ እንዘ ይብሉ ለዕጓለ እመሕያዉ ሠምሮ። ዳዊት ነቢይ ተነበየ በመዝሙር እንዘ ይብል፡ እምሰማይ ሐወፀ እግዚኦ ኩሉ ወእምድልዉ ጽርሐ መቅደሱ፡ ወርእየ ሉሎ ደቂቀ ዕጓለ እመሕያዉ፡ ፈተወ ንጉሥ ሥነኪ ወይቤ ዛቲ ይእቲ ምዕራፍየ ለዓለም፡ ዝየ አኅድር እስመ ኅረይክዋ፡ ወልድኪ ሣህሎ ይክፍለነ ሰአሊ ለነ ቅድስት።
አስተማሰልናኪ ቅድስት ወብፅዕት፤ ስብሕት ወቡርክት፡ ክብርት ወልዕልት በመሶበ ዘወርቅ፡ ዘውስቴታ ኅብስተ ሕይወት ዘወረደ እምሰማያት፡ ወሀቤ ሕይወት ለኩሉ፡ ዘየአምን ኪያሁ ወይበልዕ እምኔሁ በአሚን ወበልብ ሥሙር ምስለ እለ በየማኑ። ውልድኪ ሣህሎ ይክፍለነ ሰአሊ ለነ ቅድስት።

አንቲ ዉእቱ ተቅዋም ዘወርቅ ዘኢገብራ እደ ኬንያ ዘሰብእ፡ ወኢያኅትዉ ዉስቴታ ማኅቶተ፡ አላ ለሊሁ ብርሃን አብ፡ ብርሃን ዘእምብርሃን፡ መጽአ ኅቤኪ ወነበረ መልዕልቴኪ፡ ወአብርሀ በመለኮቱ ወስተ ኩሉ አጽናፈ ዓለም፡ ሰደደ ጽልመተ እምላዕለ ሰብእ፡ ወአድኅነነ ብቃሉ ማሕያዊ እንዘ ይብል፡ አነ ዉእቱ ብርሃኑ ለዓለም፡ እመኑ በብርሃኑ ወአንሶስዉ እንዘ ብክሙ ብርሃን፡ ወልድኪ ሣህሎ ይክፍለነ፡ ሰአሊ ለነ ቅድስት።

እግዚአ ኩሉ ዘእምእግዚአ ኩሉ፡ ብርሃን ዘእምብርሃን፡ እግዚእ ዘበአማን፡ ዘእምእግዚአ ኩሉ ዘበአማን፡ ዘተወልደ ወአኮ ዘተገብረ፡ ኅቡር ህላዌሁ ምስለ አቡሁ ዘቦቱ ኩሉ ኮነ፡ ዘበሰማይኒ ወበዘምድርኒ። ዘበእንቲአነ ለሰብእ ወበእንተ መድኃኔትነ ወረደ ወተሠገወ ወተሰብአ እማርያም እምቅድስት ድንግል፡ ወበምጽአቱ አብርሀ ላዕሌነ ወዜነወነ ትፍሥሕተ ወአቅረበነ ኅበ አቡሁ ወመርሐነ ፍኖተ ሕይወት ወወሀበነ ሕይወት ዘለዓለም በአሚነ ዙአሁ። ኢሳይያስ ነቢይ እምትእዛዙ ለኢየሱስ አንከረ በትንቢት ወይቤ፡ ብርሃን ትእዛዝከ በዲበ ምድር። ዘካርያስ ካህን አረጋዊ ጻድቅ ወንጹሕ ዘይገብር ትእዛዙ ለእግዚአ ኩሉ፡ አንከረ ወተደመ፡ ከሠተ አፍሁ ወይቤ፡ በሣህሉ ወበምሕረቱ ለአምላክነ ለዘሐወፀነ እምአርያም፡ ወሠረቀ ከመ ያርእዮሙ ብርሃኖ ለእለ ይነብሩ ዉስተ ጽልመት ወጽላሎተ ሞት፡ ወአርትዐ እገሪነ ዉስተ ፍኖተ ሰላም ከመ ይምሓረነ፡ ወልድኪ ሣህሎ ይክፍለነ ሰአሊ ለነ ቅድስት።

ናስተማስለኪ ኦ እግእትነ በማዕጠንት ዘወርቅ ዘዉሰተ እዲዊሆሙ ለሊቃነ ካህናት ሰማያዉያን እለ ይከውኑ ጸሎተ ኩሎሙ ቅዱሳን መሃይማናን እምዲበ ምድር በዉስተ ማዕጠንቶሙ ከማሁ በሲለተ ስምኪ ያዐርጉ ስእለቶሙ ለዕጓለ ዕመሕያዉ ዉስተ ማኅደረ ሥሉስ ቅዱስ አብ ወወልድ ወመንፈስ ቅዱስ፡ ወታስተሥርዩ ኃጢአተ ሕዝብኪ ተበውሐ ለኪ ኢምአብ ወወልድ ወመንፈስ ቅዱስ፡ ከመ ትኩኒ ተንከተመ ለዉሉደ ሰብእ ለሕይወት ዘለዓለም፡ ለኪ ይደሉ ከመ ትኩኒ መድኃኒቶሙ ለማሃይምናን ሕዝብኪ ኦ መድኃኒተ ኩሉ ዓለም፡ ወልድኪ ሣህሎ ይክፍለነ ሰአሊ ለነ ቅድስት።

አንቲ ዉእቱ ዕፅ ብሩክ፡ ዕፅ ሕይወት ዕፅ መድኃኒት ህየንተ ዕፀ ሕይወት ዘውስተ ገነት፡ ዘኮንኪ ዕፀ ሕይወት በዲበ ምድር። ፍሬኪኒ ፍሬ ሕይወት ዉእቱ፡ ወዘበልዐ እምኔሁ ሕይወተ ዘለዓለም የሓዩ። ጽጌ አስተርአየ እምኔኪ፡ ዘሠናየ መዓዛ ይምዕዝ በኅበ እለ የአምርዎ ዉስተ ክሉ አጽናፈ ዓለም፡ ዘበእንቲአሁ ተነበየ ዳዊት በመዝሙር እንዘ ይብል፡ ከርቤ ወሚዓ ወሰሊክ እምነ አልባስኪ፡ ሰሎሞን አብኪ ተነበየ ወይቤ፡ ፄና አንፍኪ ከመ ፄና ስኂን፡ ገነት ዕፁት እኅትየ መርዓት፡ ገነት ዕፁት ዐዘቅት ኅትምት ፍናወ ዚአኪ፡ ገነት ስለ ፍሬ አቅማሕ፡ ቆዕ ምስለ ናርዶስ፡ ናርዶስ ዘምስለ መጽርይ ቀጺመታት ወቀናንሞስ ምስለ ኩሉ ዕፀወ ሊባኖስ፡ ከርቤ ወዓልዉ ምስለ ኩሉ መቅድመ ዕፍረታት፡ ነቅዐ ገነት ዐዘቅተ ማየ ሕይወት ዘይዉኅዝ እምሊባኖስ፡ ወልድኪ ሣህሎ ይክፍለነ ሰአሊ ለነ ቅድስት።

በትረ አሮን እንተ ሠረፀት ዘእንበለ ተክል ወኢሠቀይዎ ማየ በቤተ መቅደስ፡ ወረሰያ ድሉተ ለካህናት፡ ከማሃ አንቲኒ ነበርኪ ዉስተ ቤተ መቅደስ በቅድስና ወበንጽሕ ወወፃእኪ እምቤተ መቅደስ በክብር ወበዓቢይ ፍሥሓ፡ ወሠረፀ እምኔኪ ፍሬ ሕይወት ዘበአማን እግዚእነ ወመድኃኒንነ እየሱስ ክርስቶስ፤ ኦ ቅድስት ዘእንበለ ሩካቤ ረከብኪ ወልደ በከመ ተጠየቂዮ ለመልአክ ወይቤሌኪ፡ መንፈስ ቅዱስ ይመጽእ ላዕለኪ ወኃይለ ልዑል ይጼልለኪ፡ ወልድኪ ሣህሎ ይክፈለነ ሰአሊ ለነ ቅድስት።

ለኪ ይደሉ ለአግብርትኪ ወለአእማትኪ ትሰአሊ ለነ ኅበ ወልድኪ፡ ለእለ አመነ በስመ ወልድኪ፡ ኦ ምልእተ ጸጋ፡ ኦ ሙኃዘ ፍሥ ሓ፡ ፈድፋደ ብኪ ግርማ ራእይ ዘየዐቢ እምኪሩቤል እለ ብዙኃት አዕንቲሆም ወሱራፌል እለ ስድስቱ ክነፈሆም፡ እልክቱ ይከድኑ ገጾሙ ወእገረሆሙ በአርአያ ትእምርተ መስቀል፡ ከመ ትድኅኑ እምእሳት ዘይወፅእ እመለኮተ ወልድኪ፡ አንቲሰ ኮንኪ ማኅፈደ ለመለኮት፡ ወኢያዉዐየኪ እሳተ መለኮት ፆርኪ ነበልባለ እሳት፡ ወኢያዉዐየኪ ነበልባለ መለኮት፡ ተመሰልኪ ዕፀ ጳጦስ ዘረእየ ሙሴ በነደ እሳት ወዕፀታ ኢዉዕየ፡ ከማሁ ኢያዉዐየኪ እግዚአ ኃይላት ዘኩለንታሁ እሳት ፍጹም፡ አንቲ በአማን ዘኮንኪ ምክሐ ለዘመደ ክርስቲያን።
ወብኪ ቅሩባነ ኮነ እምድር ለመኅደር ዉስተ አርያም፡ በእንተ ተሠግዎቱ ለወልደ አምላክ እምኔኪ ሰአሊት ለነፍሳቲነ ሕይወተ ኦ ጸጋዊተ ምሕረት ለእለ የአምኑ በጸሎታ፡ ሰአሊ ለነ ኅበ እግዚእነ ወመድኃኔነ ኢየሱስ ክርስቶስ ያጽንዐነ በርትዕት ሃይማኖት ዉስተ አሚነ ዚአሁ ወዘአቡሁ ወዘቅዱስ መንፈሱ፡ ይጸግወነ ሣህሎ ወምሕረቶ ትሥረይ ኃጢአተነ በብዝኅ ምሕረቱ፡ ስብሐት ለኪ ኦ ወላዲተ እግዚአ ኪሉ አኮቴት ወክብር ለአብ ወወልድ ወመንፈስ ቅዱስ፡ ይእዜኒ ወዘልፈኒ ወለዓለም ዓለም አሜን ወልድኪ ሣህሎ ይክፍለነ፡ሰአሊ ለነ ቅድስት።

በእንተ ተሠግዋቱ ለወልደ አምላክ እምኔኪ፡ ወብኪ ቅሩባነ ኮነ እምድር ለማኅደር ዉስተ አርያም፡ብኪ ወበስመ ወልድኪ ቅሩባነ ኮነ። ጸሎታ ለማርያም ወስእለታ።