ዉዳሴ ማርያም ዘዓርብ

ውዳሴሃ ለእግዝእትነ ማርያም ድንግል ወላዲተ አምላክ ዘይትነብ በዕለተ ዓርብ።

ብርክት አንቲ እምአንስት ወቡሩክ ፍሬ ከርሥኪ፡ ኦ ማርያም ድንግል ወላዲተ አምላክ ዘእንበለ ርኩስ ሠረቀ ለነ እምነኪ ፀሐየ ጽድቅ፡ ወአቅረበነ ታሕተ ክነፍሁ እስመ ዉእቱ ፈጠረነ፡ ሰአሊ ለነ ቅድስት።

ለኪ ለባሕቲትኪ ኦ እግዚእትነ ወላድዲተ አምላክ እመ ብርሃን አንቲ ናዐብየኪ በስብሐት ወበዉዳሴ።
ቡርክት አንቲ ተዐብዮ እምሰማይ ወትከብርይ እምድር ወልላዕለ ኩሉ ሕሊናት፡ መኑ ዘይክል ነቢበ ዕበየኪ፡ ወአልቦ ዘይመስል ኪያኪ፡ ኦ ማርያም መላእክት ያዐብዩኪ ወሱራፌል ይሴብሑኪ፡ እስመ ዘይነብር ዲበ ኪሩቤል ወሱራፌል መጽአ ወኅደረ ዉስተ ከርሥኪ፡ መፍቀሬ ሰብእ አቅረበነ ኅቤሁ፡ ዘዚአነ ሞተ ነሥአ ወእንቲአሁ ሕይወተ ወሀበነ፡ ዘሎቱ ኩብር ወስብሐት፡ ሰአሊ ለነ ቅድስት።

ቡርክት እንቲ ማርያም ወቡሩክ ፍረ ከርሥኪ ኦ ድንግል ወልላዲተ አምላክ ምክሖን ለደናግል፡ ዘእምቅድመ ዓለም ህልዉ ተሰብአ እምኔኪ ብሉየ መዋዕል ወፅአ እምከርስኪ ሥጋነ ነሥአ ወመንፈሶ ቅዱስ ወሀበነ፡ ወረሰየነ ዕሩያነ ምስሌሁ በብዝኅ ኂሩቱ፡ አንቲ ተዐብዩ እምብዙኃት አንስት እለ ነሥአ ጸጋ ወክብረ፡ ኦ ማርያም ወላዲተ አምላክ ሀገር መንፈሳዊት ዘኅደረ ላዕሌሃ እግዚአብሔር ልዕል፡ እስመ ዘይነብር ዲበ ኪሩቤል ወሱራፌል በእራኅኪሐቀፍኪዮ፡ ወዘይሴሲ ለኩሉ ዘሥጋ በብዝኃ ኂሩቱ አኅዘ አጥባተኪ ወጠበወ ሕሊበ፡ ዘዉእቱ አምላክነ መድኃኔ ኩሉ ይርዕየነ እስከ ለዓለም፡ ንስግድ ሎቱ ወስብሖ እስመ ዉእቱ ፈጠረነ፡ ሰአሊለነ ቅድስት።

ማርያም ድንግል ሙዳየ ዕፍረት ነቅዐ ፈልፈለ ማየ ሕይወት፡ፍሬ ከርሣ አድኃነ ኩሎ ዓለመ ወሠዐረ እምኔነ መርገመ፡ ወገበረ ሰላመ ማእከሌነ በመስቀሉ ወበትንሣኤሁ ቅድስት፡ አግብኦ ለብእሲ ዳግመ ዉስተ ገነት፡ ሰአሊለነ ቅድስት።
ማርያም ንጽሕት ድንግል ወላዲተ አምላክ ማእምንት፡ ሰአሊተ ምሕረት ለዉሉደ ሰብእ ሰአሊ ለነ ኅበ ክርስቶስ ወልድኪ ይሥረይ ኃጢአተነ፡ ሰአሊ ለነ ቅድስት።

ማርያም ድንግል ትጸርሕ በቤተ መቅደስ ወትብል የአምር እግዚአብሔር ከመ አልብየ ዝአአምር ባዕድ ወኢምንትኒ ዘእንበለ ድምፀ ቃሉ ለመልአክ ዘአብሠረኒ በክብር፡ ወይበለኒ ሰላም ለኪ ኦ ቅድስት ድንግል፡ ፆርኪ ዘኢይፀወር፡ አግመርኪ ዘይትገመር ወአልቦ ዘያገምሮ ምንትኒ፡ ይበዝኅ ዉዳሴኪ ኦ ምልእተ ጸጋ በኩሉ ክብር፡ እስመ ኮንኪ አንቲ ማሕደረ ቃለ አብ፡አንቲ ዉእቱ መንጦላዕት ስፍህት አንተ ታስተጋብኦሙ ለመሃይምናን ሕስበ ክርስቲያን ወትሜህሮሙ ሰጊደ ለሥሉስ ማሕየዊ፡ አንቲ ዉእቱ ዘፆርኪ ዓምደ እሳት ዘርእየ ሙሴ ዘዉእቱ ወልደ እግዚአብሔር መጽአ ወኃደረ ዉስተ ከርሥኪ፡ ኮንኪ ታቦቶ ለፈጣሬ ሰማያት ወምድር፡ ሠርክዮ በከርሥኪ ፱ተ አዉራኃ፡ አንቲ ማእምንት ለዘኢያገምርዎ ሰማያት ወምድር፡ ኮንኪ ተንከተመ ለዕርገት ዉስተ ሰማይ፡ ብርሃንኪ የዐቢ እምብርሃነ ፀሐይ፡ አንቲ ዉእቱ ምስራቅ ዘወፅአ እምኔኪ ኮከብ ብሩህ ዘነፀርዎ ቅድሳን በፍሥሓ ወበኃሤት፡ ዘፍትሐ ላዕለ ሔዋን ትለድ በፃዕር ወሕማም፡ አንቲሰ ማርያም ሰማዕኪ ዘይብል ተፈሥሒ ኦ ምልእተ ጸጋ፡ ወለድኪ ለነ ንጉሠ እግዚአ ኩሉ ፍጥረት መጽአ ወአድኅነነ እስመ መሐሪ ዉእቱ ወመግቀሬ ሰብእ፡ በእንተዝ ንዌድሰኪ በከመ ገብርኤል መልአክ እንዘ ንብል፡ ቡርክት አንቲ ማርያም ወቡሩክ ፍሬ ከርሥኪ ተፈሥሒ ኦ ምልእተ ጸጋ እግዚአብሔር ምስለኪ ሰአሊ ለነ ቅድስት።